Wabtec AQSh moliyaviy koʻmagida Oʻzbekistonga lokomotivlar yetkazib berishi mumkin
Muzokaralarda, shuningdek, konchilik texnikasiga xizmat koʻrsatish markazini tashkil etish, butlovchi qismlar ishlab chiqarish va mutaxassislarni mamlakat ichida oʻqitish masalalari ham muhokama qilindi.
Oʻzbekiston Respublikasi Prezidenti Shavkat Mirziyoyev Wabtec direktorlar kengashi raisi va bosh direktori Rafael Santana bilan uchrashdi. Uchrashuvda lokomotivlar parkini kengaytirish va modernizatsiya qilish, shuningdek, AQSh moliya institutlari koʻmagida texnikani uzoq muddatli servis xizmati bilan yetkazib berish imkoniyatlari muhokama qilindi.
Temiryoʻl infratuzilmasini rivojlantirish va mamlakatning tranzit imkoniyatlari parkni yangilash rejalari doirasida koʻrib chiqildi. Bundan tashqari, uchrashuv ishtirokchilari dizel-generator qurilmalari sohasidagi hamkorlik yuzasidan fikr almashdilar.
Wabtec lokomotivlar va temiryoʻl texnikasini ishlab chiqaradi, raqamli hamda servis yechimlarini taklif etadi, shuningdek, Markaziy Osiyo davlatlarida loyihalarni amalga oshiradi.
