Oʻzbekiston va Xitoyning Shansi provinsiyasi biznes aloqalarini mustahkamlaydi
Oʻzbekiston va Shansi kompaniyalari logistika, qurilish, energetika va texnologiyalar sohalarida hamkorlik toʻgʻrisida bitimlar tuzdi.
19 oktabr kuni Toshkentda konferensiya boʻlib oʻtdi. Unda Oʻzbekiston Savdo-sanoat palatasi raisining oʻrinbosari Sherzod Ibragimov mamlakat nomidan ishtirok etdi. Shansi delegatsiyasiga provinsiyaning Xalqaro savdoga koʻmaklashish qoʻmitasidagi partiya guruhi kotibi Jiao Yuyfeng boshchilik qildi.
Muhokamalar markazida oʻzaro savdo hajmini oshirish, investitsiyalar, sanoat kooperatsiyasi hamda tadbirkorlar oʻrtasida bevosita aloqalarni yoʻlga qoʻyish masalalari turdi. Ustuvor yoʻnalishlar sifatida transport, anʼanaviy va qayta tiklanuvchi energetika, energetika uskunalarini ishlab chiqarish, infratuzilma qurilishi, oziq-ovqat va kimyo sanoati qayd etildi.
Shansi delegatsiyasi provinsiya korxonalarining salohiyatini taqdim etdi va Oʻzbekistonda qoʻshma loyihalarni amalga oshirishga qiziqish bildirdi.
