Oʻzbekistonda transport biznesiga soliq imtiyozlari va kreditlar taklif etiladi
Oʻzbekistonda vokzallar, avtovokzallar va mahalliy aeroportlarni qator soliqlardan ozod qilish rejalashtirilmoqda. Bu choralar 2030 yilgacha yoʻlovchi tashishni rivojlantirishga oid prezident qarori loyihasida koʻzda tutilgan.
Hujjatga koʻra, 2027 yildan 2030 yilgacha yoʻlovchi transporti obyektlarini mol-mulk soligʻi va yer soligʻidan ozod qilish taklif etilmoqda. Muayyan toifadagi yangi avtobuslar va elektrobuslarni 2027 yil oxirigacha olib kirishda utilizatsiya yigʻimini bekor qilish rejalashtirilmoqda.
Avtovokzallarda hududning 20 foizigacha boʻlgan qismidan doʻkonlar, kafelar, mehmonxonalar va boshqa xizmatlar uchun foydalanishga ruxsat beriladi. Tashuvchilarga imtiyozli kreditlar va subsidiyalar ham taqdim etilishi rejalashtirilmoqda.
Infratuzilmani rivojlantirishga kiritiladigan investitsiyalarning umumiy hajmi dastlabki hisob-kitoblarga koʻra $4574,3 mln deb baholanmoqda.
