Olimlar mushaklar nega yosh oʻtishi bilan kuchini yoʻqotishini aniqladi
Kopengagen universiteti tadqiqotchilari mushaklarning yoshga bogʻliq zaiflashuvini tushuntirib berishi mumkin boʻlgan mexanizmni aniqladi. Tadqiqot natijalari Nature Aging jurnalida eʼlon qilindi.
Olimlar yosh oʻtishi bilan mushak hujayralarida mitoxondriyalarning normal ishlashi uchun zarur boʻlgan, hujayralarni energiya bilan taʼminlaydigan yogʻsimon molekula — kardiolipin miqdori kamayishini aniqladi.
Kardiolipin yetishmaganda mushaklar asta-sekin oʻz tuzilishini oʻzgartiradi: keskin va kuchli harakatlar uchun masʼul boʻlgan tez qisqaruvchi mushak tolalarining bir qismi sekin qisqaruvchi tolalarga xos xususiyatlarni oladi. Tadqiqotchilarning fikricha, bu hujayralarga shikastlanishni kamaytirish imkonini beradigan himoya reaksiyasidir, biroq shu bilan birga mushaklar kuchini yoʻqotadi.
Sichqonlar ustida oʻtkazilgan tajribalarda kardiolipin miqdorini taxminan meʼyorning uchdan ikki qismigacha tiklash mushaklar atrofiyasi belgilarini ortga qaytarishga va hayvonlarning muddatidan oldin nobud boʻlishining oldini olishga yordam berdi.
Olimlarning fikricha, bu kashfiyot yoshga bogʻliq mushak massasi yoʻqolishiga qarshi kurashish usullarini ishlab chiqishga yordam berishi mumkin. Biroq bunday yondashuvning odamlardagi samaradorligi hozircha isbotlanmagan.
