Oʻzbekiston va Belarus tibbiy genetika sohasidagi hamkorlikni kengaytiradi
Samarqand davlat tibbiyot universiteti va Belarus Milliy fanlar akademiyasining Genetika va sitologiya instituti ilmiy va taʼlim sohasidagi hamkorlik toʻgʻrisidagi bitim loyihasini kelishib oldi.
Universitet delegatsiyasi Minskdagi institutga tashrif buyurib, genom biotexnologiyalari va mikrobiomni oʻrganish markazlari faoliyati bilan tanishdi. Oʻzbekistonlik mutaxassislarga shaxsiylashtirilgan tibbiyot hamda molekulyar-genetik diagnostika sohasidagi uskunalar va ishlanmalar namoyish etildi.
Loyiha doirasida qoʻshma tadqiqotlar olib borish, tibbiyot kadrlarini tayyorlash, malaka oshirish va stajirovkalarni tashkil etish koʻzda tutilgan. Alohida yoʻnalish sifatida DNK diagnostikasining zamonaviy usullarini amaliy sogʻliqni saqlash tizimiga joriy etish belgilangan.
