Avstraliyaning DUG kompaniyasi Oʻzbekistondagi 3D seysmik tadqiqotlar maʼlumotlarini qayta ishlashni boshlaydi
Ustyurt Operating Company Oʻzbekistonda oʻtkazilgan 3D seysmik tadqiqotlar natijalarini qayta ishlash uchun Avstraliyaning DUG kompaniyasi bilan shartnoma tuzdi.
Tadqiqotlar 3,3 ming kvadrat kilometr maydonda oʻtkazildi, deb xabar beradi «Interfaks». UOC materiallarni qisqa muddatlarda yigʻish ishlari yakunlangani va natija yuqori sifatli boʻlganini maʼlum qildi — kompaniya bu haqdagi xabarni ijtimoiy tarmoqda eʼlon qildi. Ushbu seysmik tasvirga olish ishlari kuzatuvlar zichligining yuqoriligi tufayli Markaziy Osiyodagi eng texnologik tadqiqotlardan biriga aylandi.
Yigʻilgan materiallarni tahlil qilish yer qaʼrining geologik tuzilishini oʻrganish, istiqbolli uchastkalarni aniqlash va neft-gaz konlarining salohiyatini baholash imkonini beradi. Tadqiqotlar Ustyurtning uglevodorod resurslarini oʻzlashtirish boʻyicha keng koʻlamli loyiha doirasida olib borilmoqda.
Avstraliyaning DUG kompaniyasi seysmik maʼlumotlarni qayta ishlash va interpretatsiya qilish bilan shugʻullanadi, dasturiy taʼminot yaratadi hamda yuqori unumdor hisoblash texnologiyalaridan foydalanadi. Uning boʻlinmalari Avstraliya, Buyuk Britaniya, AQSh, Malayziya, BAA va Braziliyada faoliyat yuritadi.
Geologiya-qidiruv ishlari oltita investitsiya blokini qamrab oladi. Dastlabki baholarga koʻra, bu hududda 100 mln tonnagacha neft va 35 mlrd kub metr gaz boʻlishi mumkin. Biroq sanoat miqyosidagi zaxiralar mavjudligini hali tasdiqlash kerak.
Qidiruv ishlari ijobiy natija bergan taqdirda, hamkorlar konlarni oʻzlashtirishning keyingi bosqichiga oʻtishi va qazib olishga tayyorgarlik koʻrishi mumkin. Neft-gaz loyihasiga kiritiladigan jami investitsiyalar hajmi $2 mlrdga baholanmoqda.
